寫blog的日子

開始寫blog之後，令我想起中學的時候，
常會寫信給自己，尤其遇上疑難時，
就拿張單行紙，寫封長長的信，
然後煞有介事地貼上郵票，寄回家中．
有時候，收到信，問題已經解決了，
有時候，想法不同了，又回信給自己，
更有些時候，天使一封信，魔鬼一封信，
爭論著、掙扎著，看看最後哪個勝出．

很白痴啊！無聊的還有，
拿著錄音機扮屋企人傾偈，
然後播番出來，當是真的，
從中得到很多鼓勵呢！

公公婆婆

上個禮拜的某天，巴士上，
看見一對公公婆婆十個恩愛，
司機問：點解唔拎把遮呀？落雨噃！
婆婆瞟一瞟公公答曰：他已經看不見了，我要扶著他呢！
然後把頭倚在公公的肩膀上．
嘩！羨慕死人，我的眼眶紅了．

想起某天，很久以前的事了，
又是一對公公婆婆．
公公看見西瓜大減價，買了兩個，
婆婆很自然的抽起一個，開步就走，
豈料公公卻一手搶過西瓜，硬要自己單手抽著兩個，
點解呢？因為他要拖著婆婆的手！

三十歲人，只見過兩對如此溫馨恩愛到老的情侶，真的仍是情侶呢！
我有無咁好彩？

難忘的一個禮拜

又試一個禮拜無上過嚟，
今個星期其實好多嘢想記低，
例如與組員ａ第一次約會，
又再忍不住非禮女孩子，
男友與“朋友”的男友開拖，
好耐未試過唱Ｋ唱通宵．．．
不過以上一切發生於同一個晚上，嘻嘻．

那個晚上很特別喔，很是開心，又很不開心，
開心的是醉醉地向組員ａ訴說自己的身世，
然後施以毒手胸襲她，哈哈，感覺很好．
再度懷疑我的前世是個好色的男人，
或者前世曾被侵犯，今生愛上胸襲別人，
又或者自己有點同性戀傾向！
不過，組員ａ組員ａ，請你不用擔心，
我沒有愛上你，也不會強姦你的　：）
你也偷偷吻了我呀，你似個害羞的小女孩，好得意囉！

可惜，按捺不住問了“朋友”點解背棄我，
令到她傷心地哭了，有點歇斯底里，更反質問我點解唔信佢！
其實搞不清楚我們的關係，究竟有幾友好有幾友愛，
很多事情的確可以攤開來講，有些時候卻又覺得很是疏離喎．

結果呢，男友知道我覺得被傷害了，無端端發脾氣掟起杯來，
對方男友於是一撲而上，泰山壓頂，二人扭作一轉．
男友被打後（其實都唔算打ｏ既，只係被推撞ｏ者），
慣例地哮喘般的憤怒，搞寸咗個party囉．．．
最好有人離去之後，我哋又如常唱歌，平靜得很快啊！

朋友

從來都對朋友很認真，
人家說：下個星期二出嚟吖，
我真的會騰空星期二，期待著約會，
可惜原來只是空話，
回電對方，總是得到哎呀，唔記得咗；
唔好意思，約咗第個等等的回覆，
心漸漸的淡了，
不過每次訂下約會，仍然充滿期待．

最近又有一個朋友傷了我心，
有一晚，朋友說如果人工俾到幾多幾多，就過檔幫我手，反正她做得不開心．
第二日我即時厚著面皮和上司講數（為自己爭取都唔會咁有吉士呀），
獲批了，於是滿心歡喜痴痴地等；
結果呢，朋友說要過年之後才辭職，她有她的計劃，
ＯＫ啦，作為朋友，講個信字啫，唔使逼人埋牆角，
唯有為她未上任前的空檔冒著汗地盤算著．
新年過去，真話來了，說道甚麼“都係想睇定啲”，
嘩，嗰吓真係耳邊嗡嗡作響，個心ping ling pang lang地碎掉，
然後仲要笑笑口同佢講“咁無口齒ｏ架你”！

心裡又一次懷疑，我係咪太天真？
我當你朋友，你當我老襯？抑或恃熟真係可以賣熟？
朋友之間反而唔使講口齒？
我簡直死得不明不白，灰得很．

假不起

與舊組員ｉ吃飯，
以為自己可以若無其事，嘻嘻哈哈繼續扮friend，
結果是全程全無眼神接觸，
我沒有正眼看過她，
因為心中還在氣．

曾經真心的認為我們是朋友，
除了我的感情事童年事，
其他的想法動向心情都坦蕩蕩地告之，
豈料她辭職離去的時候，
我就像一個傻瓜，最後一刻才被通知．
還記得，那一刻，飯堂裡，我哭了，
有點徬徨有點激氣，因為事前全無徵兆，
而我呢，就算去見見工，也告訴她．

痛心的是，問她去向，她竟然撒謊，
當我說：“如果上司問我你往哪兒，我就這樣答他喇，
若然他日不是，我會好瘀囉！”
她想了一想，仍然堅持講大話耍我．

臨走還要插多一刀，扣假提早離去也不說一聲，
解釋是：“對方等人用，催我早點返工哩！”
喂喂喂，你在這裡一年多，也知這裡也極等人用呀！
我不是說，你要待我找到人頂替你才可離開，
作為一個朋友，有點義氣的話，都該給我一個預算啩？！
我以為一個月通知ｏ架！人哋咁等人用，補錢俾我哋即刻走吖！

哈哈，最後給我知道她離去之後，打過電話給對家，
她的目的終於揭露了．．．

人望高處，我當然不會阻人發達，
只希望人家當我是朋友ｏ者，很過份嗎？
是不是我太天真了？

鎖與匙

天間有位工匠，
做了很多很多把鎖，每把鎖都只得一條專用的鑰匙．
有一日，鎖與匙都掉到凡塵裡去，
從此各自尋覓與自己相合的配對．

有一些，鎖遇上匙，開啟了，以為終於找上，
卻不知道那不是為它而設的那一個，
直到老死，仍是錯配．
有一些，窮盡一生，都找不上，鬱鬱終老．
誰較不幸？

兩者兼得

朋友對男友說：唔好亂諗啦，對el好啲啦！心即刻往下沉．
從來都知道，他心裡有個她，
曾經一起，愛得天崩地裂，纏得死去活來，永遠刻骨銘心．
總是不明白，她已經成為別人的一個她，
他也已是我的一個他，
點解過時過節，她還要致電他，說些噯噯的話？
又或說道她很妒忌我．
聽落，很是火滾，小姐，是你放棄，今日才輪到我的呀？
羨甚麼慕，妒甚麼忌？乾脆離婚再來愛過吧．
當初就是愛得不夠才分的手，請不要再牽著他的鼻子走！

突然想到奀子說：好多男人都滾ｏ架啦！
於是回到少女時候常想的一條問題：
你要你的男人心裡背叛但肉身專一，
還是搭上n個女生，但心裡只有我一個？
係咪真係唔會兩存其美？可唔可以兩者兼得？
（當然係精神肉體都專我唯一，
難道要個心裡沒我而又爛滾的仆街？）

返來咯

呢兩個禮拜忙到飛起，
又要趕稿，又要忙住病，
先是嘔到潤都嘔埋出來，
再來疴到腸都DUN埋出來，
惟一得著是乾瘦了，
於是尋晚拿拿臨敷番塊mask :)

其實，日間遇見種種，有點想法，
總想寫低，留下回憶，留下感想，
只是抵不住周公子的誘惑，
乖乖上床去．
以後希望身體健康，意志堅定，不枉生活，哈哈！

興趣

每個人總有興趣，
例如男人普遍鍾意打機、玩車、玩音響、玩女人，
女人嘛，很羨慕那些愛入廚的，
煎炒煮炸炆燉焗蒸煲滾，已經花掉幾粒鐘；
又有些喜歡做點手作，陶瓷呀、黏土花呀，
我可沒那點耐性心機．
睇書呢？只愛讀小說，
那些深度的說教的歷史的，看得天花亂墜頭昏腦脹；
音樂也沒特別喜好．
很頹很沒味道的生活，就連性趣都消失了．
以前常聽人說，女人三十，特別需要，
那時心裡升起一層恐懼：死喇死喇，點算呀？
依家咁樣，反而更加不知怎算．

沒有

三十歲人了，
沒有童真，不會嘻嘻哈哈叫叫跳跳過日子；
沒有內涵，在blog海內游歷，發覺大家很有思想很有靈魂啊！
沒有樣貌，同事不會向我說我是全公司第三美的女孩子；
沒有身裁，拿起舊衣舊裙舊褲，結果大多穿不上；
（好似那個奶粉廣告歌詞：點解稱心的衣裳，現在已經穿不上；
當天喜愛的寶貝，現在已經不愛了．）
沒懂做人，對著新官臭四不曉表現自己；
沒有生活，日日營營役役返工放工除出睡覺食飯拉屎就是工作；
沒有情人，連男友都沒時間招呼打情罵俏卿卿我我；
沒有朋友，想出街食飯飲酒來來去去都是那兩，三個；
沒有錢，可能這就是最大問題吧，
讓我幻想一下，如果有錢，我會怎樣？
哎呀呀！還清巨債之後，原來我還是如此，可憐復可悲．

人?性?

初初看見扑濕，大家很是興奮，
湧上去看、留言、分享、討論；
過了幾天，開始有人懷疑有些人別有用心，
然後變得很小心，有啲驚，甚至卻步，
這是不是人性？
啱河車的，飛身撲上，
思前想後，猛然發覺那個人那件事那個blog並不怎樣美．．．

可能我比較無腦、沒心肝，
很多時唔理三七廿一想都沒想便做了（我也這麼鼓勵我的姊妹們），
然後被傷害，幸好很快又復原，
留低的就是笑自己：咁乸蠢ｏ既？！
以及回味又回味．真係唔得佢死！

既然講得開心，
懶理你是女人或男人啦！
橫掂大家三九唔識七，繼續暢所欲言囉！
我只係驚友人發現了我，
在暗地裡看著，竊笑，想著：哦．．．原來你和男友是這樣的．

火花

cuiyao叫我多點寫blog，
但實在沒時間，
尤其是連上"blog's up（扑濕）"之後，
睇都嚟唔切，何況寫？

還有，在blog海內游歷之後，
實在覺得自己乏善足陳，慚愧！

講開"扑濕"，實在為我的悶蛋生活添上點點火花，
其實，我幾鍾意睇，講，聽嗰啲嘢，
尤其自己缺乏這種生活的時候，
睇吓都叫人精神一振．

喂，我真係覺得有趣喎，
呢啲睇書學唔到ｏ架嘛，
睇四仔又好似誇張過頭，
女友們（除咗兩，三個之外）又唔鍾意宣之於口，
難得可以了解一下人哋ｏ既經驗，
真係好正！

心

愛，慾，憂，忐忑，統統與心有關，
但，一個人的七情六欲，關個心屁事？
心臟，只是人體的一個泵，讓血液循環，好叫新陳繼續代謝；
情緒，不是都因腦部接收感觀訊息，釋出分泌而來的嗎？
那麼，有沒一種藥物，可以叫人開懷舒暢，心花怒放？
又有沒一種藥物，可以忘卻不快，緊記美好？

不過，沒有腦袋，還可存活，
沒有心，一切已經無晒意義了．

年輕真好

上次上來已經是一個星期之前，
又是這個時候，很攰，很悶，有點暈．．．

這個星期發生過乜嘢事呢？
很多很多，都是不開心的，頭就快要炸開．
話時話，好像很久未試過為著一件事，一個人，
高興得無端端ｏ桀一聲笑出來．
看著同事ａ，覺得年輕真好，
為著一次相聚，又開心，又憂心，忐忐忑忑，
我也很久沒試過了，
是好，還是不好？真的不知道，
這樣生活，沒甚意思，就像這個字體的灰，可憐！

虎

我屬虎，男友屬馬，
我們就是馬馬虎虎，活一天算一天，
本來覺得幾夾，
只是他那懂風水養鬼仔的父親，向他說了一句：千祈唔好屬虎！
心裡從此多了一條刺．
尤其是最近當他本來打算轉工，
點知老細返咗大陸之後音訊全無，
（可能因為嚴打fing頭給拉了進教導所），
更加覺得：唔係化．．．唔通我真係剋住佢？

小時候，人家說川字掌的女孩剋父剋夫，
我便常用指甲往自己的川字掌界，
希望將兩條線接連起來，
結果當然唔成功，否則我今日唔會覺得我剋住佢．

不過，原來我唔可以屬虎，
只因佢老媽子屬猴，
據說我們因此註定水火不容，
想到這裡，我與同事ａ應該狗咬狗骨，誓不兩立，
然，我和她還是好好的，無穿無爛，
還互相睇對方的blog，幾好呀！
抑或，我們因為臭味相投？

美好的生活．．．

現在的生活：
就算七點半收工，
返到屋企已經超過九點，
煮飯，進食，看套看過不下十次的電影，沖涼，餵狗，放狗，已經零晨四點，
瞓四粒鐘，然後好有discipline咁十點半返到公司，
不停的開會開會再開會，
準時的話，七點半收工，重覆以上生活，
攰得很，呆得很．

期待不久將來便搬屋，
到時可以七點半收工，八點回到家中，
狗狗長大了，落街放狗一小時，還只是九點！
就算me me mor mor四個鐘頭，
因為第朝可以九點先至起床，
便有八個鐘頭睡眠時間，
想想都開心，哈哈！

不過，極之可能發生的是，
恃著住在港島，然後晚晚蒲銅鑼灣，
與友人飲酒唱Ｋ談談近況說說笑，醉倒．．．
結果就是個樣比依家更殘，
精神比依家更差，
卡數比依家更多，
不過心情應比依家更好！
值得嗎？我說我願意．

大海嘯

元旦過後，本來想寫個零四的一至一百，
熱情卻被公司的大海嘯打沉了．

新官用兩個字形容美術：核突，
再用兩個字形容攝影：求其，
還說現在的製作，是最差的時候了，差點又以兩個字形容：垃圾！
一嘢一嘢冚過來，心情直往下沉，完全被淹沒了 ．

我唔覺得囉！究竟新官有無睇過以前o既製作？
嘩！那才可笑！抄報導，用舊相，沒觀點，
簡直唔想話俾人知我喺度打工！（事實上，講咗可能都無人識．）
依家已經好好多喇，
如果你話：比起以前，好咗好多，不過可以更好，
我唔會被一下打沉囉．

又，發覺原來有些人真的有點本事，
可以靠訶謏奉承，
可以靠講得天下無敵，
而站得住腳．
我是不是應該學習學習？

乞人憎

我的世界裡充斥著乞人憎的物體．
最看不過眼是那種認屎認屁的人，
最近又有兩個事例：

一．
某天和某集團老闆食飯，
說到現今請人極其困難，
老闆說（帶著自豪的語氣）：
我的秘書沒幾個做得長，
有些真的蠢得可憐，
重要的文件擺埋一邊，
要我在佢枱面發現，
連接電話都可以記錯對方姓名，
唉．．．不過如果佢哋以前未跟過一啲好似我咁成功
（嘩嘩，來了，成不成功竟然是自己說的）
公司業務咁廣泛ｏ既老闆的話，
真的很難適應（言若有憾，實質暗讚自己）

老兄，你的生意的確做得不錯，
一年真個賺得盤滿砵滿，
但也不用這樣自己讚自己的吧！
難得的是在座各位大聲稱是，
沒有一個想嘔，在下實在佩服佩服．

二．
各位阿頭正在討論每個禮拜總有一日開通宵之際，
有條臭四說：只要管理得好，安排得宜，根本不需加班！
我以前在某某集團的時候，根本唔使開ＯＴ，
如果習慣了ＯＴ的話，那就不是ＯＴ啦！
（雖然小妹英文不好，但也知ＯＴ應該是指OVER TIME，
意即超過官方規定返工時間仍要工作嘛！
嘩！大佬，如果習慣ＯＴ就不叫ＯＴ，
習慣挨窮就不叫窮人，
習慣口臭就不是賤人了？）

然後再加一句：如果七點都未收得工，即係代表你有問題，效率低呀！
如果我可以像你遊來遊去負責擦鞋，
如果我可以像你隨口UP當秘笈，
如果我只是踩低別人抬高自己，
我都可以七點收工呀，仆街！

點解我的世界充斥著這類認屎認屁的人?!
是我的不幸，
抑或這個世界根本就是這種臭四佔了大多數？

快樂就是．．．

新年快樂！
本來這個新年不太快樂，
因為世紀慘劇剛剛發生．

還是約了一班朋友倒數，
這可是拚著生命危險的，
因為今天還要返工埋稿，
（依家咪就係喺公司埋頭苦幹囉！）

結果玩到卡拉ＯＫ打烊，
當時是朝早七時三十分，
員工向我們咆哮：你哋走啦！我哋真係要拉閘喇！
零五年第一日便如此乞人憎，會唔會開衰咗個頭？
好驚！

走在街上，等的士中，
大家忽然興起與途人握手祝賀新年快樂＠.＠
有些欣然接受，有些好像我們發瘋似的（其實可能真係），避到老連咁遠，
活該他們得不到我的祝福！

經此幾握，發覺原來要開心，都幾容易，
唔使錢，唔使爭，只需面皮厚．

扮嘢精

這個世界扮嘢精何其多！
自覺很美的美女，時常"不經意"地騷首弄姿，扮嘢！
硬是擺出食鹽多過你食米的老屎忽，扮嘢！
踩低別人抬高自己邀功爭寵的臭四，扮晒嘢！
最頂唔順是那些明明在香港土生土長，卻扮晒竹星仔ＡＢＣ的物體．
近排遇到兩個：
一．酒吧中，廁所內，拿出潤唇膏，
友人突然以十足驚歎的語氣，爆出一句：Oh! This is the best lipstick in the world!!!!!!!!
阿姐（都說這個稱謂是用來稱呼乞人憎者）！使唔使呀？直想衝返入廁格嘔！
回到坐處，看見啤酒，忍不住說了一句：唏！呢個係世上最好飲ｏ既啤酒！
她還懵然不知是在寸她，答道：yeah...I agree！
真係激到啤啤啤三聲．

二．與新相識談到自己的職業，
對方說：每個星期咪要寫好多中文囉！你好犀利呀！
you know（完全唔明點解各位英文人要成日u know u know的，又唔係玩緊uno）要我睇都難呀！睇中文真係好辛苦...
喂喂喂！聽講你在香港出生，長大，上的是中文大學，你竟然話唔識睇中文?!唔係化．．．
真想講句：仆街，f_uk u識聽喇啩！
（唔好意思，最近睇同事ａ的blog睇得多，人也變得粗口了）