杏仁童話

森林來了一隻獅子乸，
整日咆哮，威震河東不特止，
簡直震撼整個南華．

獅子乸同老虎女投契如親生，
齊齊夾攻老狐狸，
老狐狸被調配邊疆，
從此無得狐假虎威，
大快人心！

然後，獅子乸唔識死，
走去撩獅子王，
獅子王不需怒吼，
只需敦起"老虎王都要畀三分薄面我"o個個款，
立即叫獅子乸退避三舍，
更加大快人心！

獅子乸再去搞雪橇，
雪橇卻自顧自拉車，
以為河水不犯井水．
豈料獅子乸咄咄進逼，
叫雪橇學河東獅，得閒咆哮吓，下屬才會驚，
雪橇再次強調，河東獅not my cup of tea，
兩者僵持不下。

結果，老虎王找來山羊伯伯，
山羊伯伯深明雪橇就是雪橇，
學鄧伯伯話齋，
捉到老鼠便是好貓，
拉得好車就是好雪橇，
自此雪橇優哉悠哉，
不再理會獅子乸．

一物治一物，就是這個道理；
specialisation of labour，就是這個道理；
有料就會有人識貨，就是這個道理；
有時不需咆哮，
已能叫人信服，
山羊伯伯，“些些”！

杏仁童話III

土撥鼠愛撥土，卻不理週圍環境，
從前已經試過在大黑熊的領域，
挖了個洞，跣了大黑熊一鑊，
如今竟然將泥土撥到老虎仔身上，唔識死。

老虎仔發怒了，說要土撥鼠在森林範圍消失，
老狐狸和豺狼企埋一邊，事不關己，
雪橇走去幫口，說甚麼土撥鼠只是無心之失，大人不要記小人過之類，
但老虎仔氣難下，硬要在此等小時上顯示自己的威嚴，講唔掂數。

然後，土撥鼠走去找獅子，
獅子常說，老虎大王也要給我面子，我睇住老虎仔大也，
如此閒事何罪之有？還要教訓教訓他，成大事者，胸襟不得如斯狹窄。

結果，老虎仔受到獅子訓示，如醍醐灌頂，從此收歛氣焰，
並責怪大黑熊、老孤狸、豺狼等，沒為森林着想，沒想留住土撥鼠。
而土撥鼠亦繼續在森林中優哉悠哉挖陷阱，與雪橇合作捉獵物，
大團圓，兼大快人心。


但，現實卻是，
獅子都覺得關人鬼事，叫各位緊張土撥鼠死活的，自己收拾殘局。
沒人幫手挖洞了嗎？雪橇，你想想法子。
高層永遠在擺架子，
着着實實做事的，總是受苦的，無助的一群。

森林大會II

老虎大王繼續臥病，由老虎仔主持大會。
仍是老問題，老狐狸捉唔到兔仔，亦答不上嘴幾時捉到，呢吓認真夠死。
老虎仔：究竟多餘嗰日（森林裏一個禮拜有八天），你哋在做甚麼？
老狐狸九唔搭八：我哋會俾心機整靚Ｄ陷阱ｏ架喇！
老虎仔：你哋有無檢討過你哋ｏ既狩獵技巧，又有無諗過，究竟想捉乜嘢獵物？
老狐狸：乜都捉囉！
老虎仔：哼，咁即係無諗過，唔該你同狼及狽傾清楚先！
老狐狸ｏ依ｏ依哦哦，眼厲厲嘴藐藐。

然後，老虎仔轉問狼：你又捉到山雞冇？
狼見老虎仔燒到自己嗰叠，就推卸責任，賴得就賴：老狐狸捉唔到兔仔，我無力捉山雞喎。

卒之，本來同一陣線表面馴服暗地嘲笑老虎仔的老狐狸、狼及狽內閧，
互相撕殺，同歸於盡，死無全屍。

呢個故事教訓，與虎謀皮，固然驚險，不過老虎惡到出面，未算恐怖；
與狼同行，則知人口面不知心，死咗都唔知乜事。

杏仁童話

森林大會。
老虎咆哮：「狐狸，點解你成日捉唔到兔仔？
我過你兩招，你又唔用，正一仆街冚家鏟！」
狐狸被罵，頭耷耷眼濕濕，死狗咁樣。
老虎繼續發火：「你睇吓小獵狗，我話做乜佢就做乜，依家人哋幾掂？！」
狐狸不敢聲張，只在心裏暗罵：「嗰隻小獵犬，老虎叫你去死，你真係去死，
做壞規矩，正一仆街冚家鏟！」

某日，老虎病倒，由老虎仔主持大會。
老虎仔比較實事求是，不像其父只有佢講無人哋講，
問道：「究竟幾時有兔仔食？大家就快餓死了。」
老狐狸（在老虎仔面前，狐狸變成老屎忽，所以升格老狐狸了）非常敷衍，
答曰：「唔係話捉就捉，一步一步慢慢來。」
老虎仔：「嘥氣！咁即係幾時，你俾個時間我。」
老狐狸繼續九唔搭八，大耍太極：「整靚啲個陷阱，自然捉到兔仔……」
老虎仔一聽，極之不滿，轉向大象：「你幫我問佢，即係究竟幾時。」

然後，老虎仔又問夜貓，
夜貓有條不紊地說：「我諗擺啲紅蘿蔔喺陷阱度，可以吸引到兔仔。」
老虎仔終於笑了：「啱聽！」
然後望望老狐狸，翻翻白眼，擺出太子的威嚴：「只有夜貓講的話啱聽！」

會後，老狐狸與狼和狽一起啤哩吧啦：「老虎仔講嘢都無氣，要大象傳話，哈哈哈哈．」
結果，老虎大王挑通眼眉，睇穿老狐狸根本無料到，
最離譜是時常狐假虎威，楂住雞毛當令箭，
終於殺了老狐狸，還吃了狼和狽，奸的統統死掉。

可是，現實並非如此，以上純屬杏仁的童話。