恐怖襲擊

那個半自傳半投資書的最後一個訪問，
被訪者問：你o的狗狗幾大呀？
「一隻四歲半，兩隻十月就四歲，一隻唔知．」
被訪者說：噢，壯年了呢！

壯年！！！這句說話就像恐怖襲擊，
行駛中的巴士突然爆炸，
讓目擊者感覺震憾，
耳邊嗡嗡作響，
腦裡轟轟轟轟，
縈繞低迴．

昨晚，望著她們，哭了，好驚好驚．
今日，埋稿症候群發作，好忟好忟．
老闆又竟然閂o左電話，咁篇專欄寫乜欖ｏ野呀？
陰霾．密布．

星級，升級？

瞥見壹仔今期封面，
圖文並茂報道鄧聲聲背妻拖女．
好耐無見壹仔再爆呢類新聞，
都幾新鮮，都幾爆．

不過，當中又有o的爆笑，
這位「財演」，竟然突然升級變o左「星級股評人」！
咁又係o既，如果條題係話財演偷食，
震撼力就大大削弱．

記得以前在壹仔，
上司教落，能吸引最多人睇者，
第一位是上流人做下流事；
第二位是下流人做下流事；
接著是下流人做上流事；
最後才是上流人做上流事，
即是富豪捐錢扶貧做慈事o既報道唔會叫好更不叫座．

所以，捉到人黃腳雞，
山雞都即刻要變成鳳凰，
財演也立即升格為股神．

又再諗深一層，
其實財演又好，股神又好，
背妻拖女關我攬事？
作為一個財經記者，
追呢類新聞應不應該有成就感？

又等如起底故仔，
其實也沒甚意思，
尤其當你起完底，
當事人未幾便被綁架之後．

示威

又有運輸工人示威、抗議、要求加薪。
實在不明白，點解加薪幅度要睇齊通脹？
我都想我o既人工同通脹掛鈎，
通衰o既時候，以相同點數減薪又有何干？

又一矛盾

本來人生只有四大矛盾，

寫（或改）不完的稿，
執不住的屎，
還不完的債，
減不完的肥．

近排鼻子突然發作，
至發現原來仲有
吸不完的毛！

幾時會有
使不完的錢？

崩潰

當以為自己會崩潰的時候，
到頭來卻十分安靜，
那才覺得悲哀．

杏仁童話

森林來了一隻獅子乸，
整日咆哮，威震河東不特止，
簡直震撼整個南華．

獅子乸同老虎女投契如親生，
齊齊夾攻老狐狸，
老狐狸被調配邊疆，
從此無得狐假虎威，
大快人心！

然後，獅子乸唔識死，
走去撩獅子王，
獅子王不需怒吼，
只需敦起"老虎王都要畀三分薄面我"o個個款，
立即叫獅子乸退避三舍，
更加大快人心！

獅子乸再去搞雪橇，
雪橇卻自顧自拉車，
以為河水不犯井水．
豈料獅子乸咄咄進逼，
叫雪橇學河東獅，得閒咆哮吓，下屬才會驚，
雪橇再次強調，河東獅not my cup of tea，
兩者僵持不下。

結果，老虎王找來山羊伯伯，
山羊伯伯深明雪橇就是雪橇，
學鄧伯伯話齋，
捉到老鼠便是好貓，
拉得好車就是好雪橇，
自此雪橇優哉悠哉，
不再理會獅子乸．

一物治一物，就是這個道理；
specialisation of labour，就是這個道理；
有料就會有人識貨，就是這個道理；
有時不需咆哮，
已能叫人信服，
山羊伯伯，“些些”！

給自己的功課

短期目標，
好好對待我組的謝拉特，
好好對待我組的新成員。
好好還掉第一筆債項，
逃出第一重生天的感覺真好好好好好！

中期目標，
我的志願，我還牢牢記住，
那是我視為代表作的一個訪問的一次啟發，
其實一直在我心裡躍動，
那會實現嗎？

長期目標，
優雅地老去，
不要死命拉著甚麼，
不用拚力抓著甚麼，
只需積極地面對未來！

尋尋覓覓,兜兜轉轉...

少女時已知道，找男朋友，
從來都不希冀是個靚仔的，
也不希罕有個有錢的，
一直本著找個愛錫我的宗旨，
尋尋覓覓，自詡十分理智。

抑或，找個靚仔的或有錢的，

會比較簡單？

起碼滿足了願望，

死而無憾。

兜兜轉轉，到頭來，
依然杳然一人，
就多了四個囡囡。

猶幸她們不會不孝，
我還會伴著她們終老。

相認

買妹妹ｏ既時候，

還愛上了其兄弟，

親暱地稱之為細佬．

可惜一個轉頭，

細佬已經被人買走了．

有些事，不把握當下，

便會溜走．

四年多以來，

一直尋尋覓覓，

希望再遇上他．

終於，給我在網上再次尋回，

當然立即來個相認，

兼相約在泳池，

來個兄妹戲水！

細佬依家叫牧牧，

從其主人口中得知，

妹妹同牧牧仲有其他姊妹！

我ｏ地會否有緣遇上？

見工新人類

又在見人。
很久很久沒請人了，
對數年前的「忽、薯、倔」猶有餘悸，
豈料青出於藍，
如今的新世代，
更忽更薯更倔。

來見財經記者，
一出口卻謂志願是當飲食版、旅遊版、潮流版記者，
已經見慣不怪，
我的底線因此愈調愈低，
認為只要有sense只要肯學就可以了，
到頭來仍然不得善終。

忽忽地聲言，
平時看報紙沒看財經新聞，
更加沒買財經週刊的習慣，
自己也沒任何投資，
最後還問，其實敝集團本女性潮流雜誌請不請人。（！）

薯薯地則謂，
沒想過自己想做甚麼，
只是哪裡請人便應徵，
既然我願意見他，
他便來試試，充實面試經驗。（！）

倔倔地又是另一回事，
致電約見：「你早前寄信來應徵，還有沒有興趣來面試？」「都ok o既．．．」
「你幾時方便？」「我要返工ｏ架喎，起碼七點之後啦！」
「你知唔知我哋地址？」「唔知喎！你講吖！」

我不知道這些新人類是否覺得這樣好有guts，
還是這樣叫做直腸直肚率真坦白諸如此類，
但我覺得這樣叫做不尊重不禮貌沒教養。

不會獨行

分手了。和平地。

六年零四個月的光陰，有喜有悲，
有些難忘時刻，或許我這一生都不會再遇見，
例如利物浦絕地反擊捧走歐聯？
有些重要時刻，你再也不會共同度過，
例如利物浦終於奪得英超冠軍？

不過，我也不會孤獨，
我還有我的好友、我的小狗，以及我自己．
永遠不會獨行．

存愛

愛情是一本存摺　零存快樂
每天查詢有多少的餘額
你設下難猜密碼　把自己所鎖著
既然給你的　我就不會捨不得

我沒有藉口　去預知你的自由
你沒有理由　為了償還愛的承諾　放棄你的天空

愛你　很多很多
只想存給你快樂　卻提領更多寂寞
存愛　存在記憶中
回憶它讓我富有　思念確讓我貧窮
還有多少青春可以揮霍　對愛的執著
就讓淚水靜靜慢慢流在驀然回首

－－存愛　楊宗緯

輪迴

未到季尾，已經死了，
曾經充滿希望四年抱兩，
如今卻是四大皆空．
是天意弄人？
如果不是那記烏龍，
如果巴布早點入波，
或者，
願望可以成真．
以現時人腳，以輪換制度，
下屆又再充滿期待．

無論睇波，抑或工作，
都是這樣地不斷輪迴，
期復一期，季復一季，
由希望到失望，
捱過了，又再充滿憧憬．
人生或許亦然如是，
就是這樣地浮浮沉沉．

進化

讀書時叫涼薄，
初出茅廬時叫做得過且過，
入行十年後被譽為ＥＱ高．
這是進化？

生生死死

這一天，有生有死．

凌晨時分，
利記出線歐聯八強，
創下一個國家四隊球隊進入八強的光輝歷史．
本來沒存半點希望，
因為要破紀錄，談何容易．
木先生說，足球場上，數據並不可信；
然我卻說，數據代表着某種軌跡，唔到你唔信．
其實，踢波某程度上幾似人生，
無論你如何努力，如何奮鬥，
結局往往不受控制，不如人願，
這，叫做命．

中午時分，
男友說，阿寶走了．
三日前，仍然食得瞓得，
今天，無聲無色地走了，
走到彩虹橋的另一邊，
繼續吃喝玩樂．
養狗是一種體驗，
回來時還是嬰兒，
轉眼間長大了，
甚至年長過自己，
然後老去，死亡．
生老病死，
濃縮的一生，
快樂沒得濃縮，
苦難也沒得濃縮．

靈魂

營營役役...勞勞累累...
對於每日所看所聽所遇，
似乎毫無感覺，毫無得著，
我的靈魂不知往哪裡去了，
虛虛空空，
抑或，我內裡從來只是一片虛空？

從絕望中離開

三個月沒寫blog，
每天都在營營役役，
不過，忙碌之中還有兩大娛樂，
就是睇波與吃喝．

睇波，令人不斷沉淪，
從開季的氣勢如虹，
到上半季結束的被拋離，
利物浦，離乜譜．
好了，就在乜盃都無的時候，
歐聯還要抽到對國米，
仿如綁著五千萬斤鉛被掟落海，
浮番上去已經死掉．

豈料絕望之時，奇蹟又再出現．
我不知道馬達拉斯是否應該紅牌被逐，
我只知道他真的侵犯了托里斯；
我不知道哥度巴受傷是否大大地削弱了防守，
我只知道他的出場，並非利記造成．
或者足球永遠就是這樣的令人意想不到，
或者利記永遠就是這樣叫球迷死過翻生，
才令人著迷．

至於吃喝，叫人沉淪的是，
我六年之間竟然重了四十磅！
幾時才會離開這個深淵？

一波未平,一波又起

兩代球王相遇，真的令人期待．
有人覺得殘忍，
森柏斯都退休五年了，對着一哥費達拿，
歲月催人老．

凡事總有兩面，
森柏斯技癢了，打個亞洲tour過癮下，有何不可？
不用太認真吧．
而費達拿也難得遇到如此一個強勁對手，
那種刁鑽，那種進取，並非所謂宿敵拿度所能比，
從中一定有所得着．

這場波，好好睇，好開心．
另一場波，則是大快人心，
英格蘭在歐國盃終於出局！
現在最期待的消息，
是麥卡倫被炒之後，
舒利亞（其實最好係摩連奴啦）上場，
幹掉林伯，哈哈！

舊

突然興起集體回憶、保護文物，
其實就是懷舊．
舊，除出年齡老大之外，還有點已逝去的況味．
舊人舊事舊物，通通都是過去式．
人為何會舊？物為何會舊？
因為已經被遺忘．
點解突然懷舊念舊？
因為這些本來已被遺忘的，
真的要實實在在地消失．
明明已經丟低不理，
從來不曉得珍惜，
到真正失去時又捨不得放手，
人就是這般犯賤．

剛剛睇完一個電視特輯，
關於北京的胡同．
老外說：人們明年到北京去，
不是想睇到現代化，不是想睇到高樓大廈，
而是想參觀舊城風貌，清拆胡同非常不該．
老百姓卻說：老早就想搬上樓！
點解胡同在時，你不來遊一趟？
點解人家上進，你卻認為應該原地踏步？
點解紐約倫敦巴黎可以現代化城市化，北京就要困在死胡同？
點解人家活在死胡同就是文化，你的貧民窟卻是罪惡之源？
點解看不過眼人家建設前園，卻不理自家的後院？

牽扯到景賢里，庭臺樓閣小橋流水確是古老文物，
但需不需要顧全私有產權？
張狂人會否因此現身說法，講解高斯定律？
再延伸落去，一百年後，兩百年後，
匯豐總行、中銀大廈、國金中心，係咪唔可以拆？

升職不加辛？

十月一號起，小妹由副總升為老總，
可將任何事物都與性事扯上關係的魚先生說：老闆除了我的「副」．

恭賀之聲當然不絕，
當中三個尤其縈繞於懷．

1.打比二號說：u're incredible！
有幾不可思議o者，我覺得我實至名歸喎．

2.奴才對眾組員說：你老細升o左職呀！
語調酸溜溜的，像我就快踩到他頭上，騎在他的背上去．
明明我升來升去，都在他旗下，
點解唔可以諗o下：我條o靚被大老闆賞識，正！
辦公室裡的人（抑或人回到辦公室）總是這個樣子，
人家向上爬，立即唔抵得，
人人齊吞噗，才叫好兄弟．

3.終於有句人曰：其實你一早已經做緊o個o的o野啦！
咁又係喎，我負責o既兩本書，都就o黎一百期喇．
一直以來，上面只得一個大老闆睇住，
那位高手薯片，最好唔好搞佢．．．
我一直就係老總，總務個總啦！