十九年之癢

繼九零年班尼斯後，

謝仔終於成為另一個利記球員榮膺英格蘭足球先生，

一解十九年之癢！

恭喜恭喜！

至於另一個十九年之癢．．．

未到最後，

我都唔會放棄！

力氣

我的日子如何，
我的力氣suppose也如何．
如今， 我真的沒力氣了，
我往後的日子會不會好過一點？
抑或，我的小宇宙不止於此？

阿禪

最近，o係街見到o的阿蟬，
就會覺得，我比她們差嗎？
希望，我只會變成阿禪，好禪的禪；
而唔係阿蟬，日娥夜娥的蟬．
抑或，找到那個共嬋娟的嬋？

負責任

原來，
想做一個負責任的狗主，並不容易．
想對自己負責，更不容易．
當揹着另一些生命，
擔子，真的很重．
只需一根稻草，
真的足以令人垮下來．

兩個人

從天氣晴，從海生館，
延伸出兩個人－－
泰戈爾與余光中，
有空，希望翻他一番．
這是給自己的功課．

發現

看「天氣晴」的時候，
除了當地風景人情令人嚮往，
那把女聲，一聽已經觸電．
煲了這麼些劇，
從未試過沒有飛掉主題曲同片尾曲，
那是唯一例外．

那天晚上，小巴上，
聽見一個音樂人接受訪問，
說著說著自己的女兒怎樣有天分，
十二歲學結他，十六歲懂作曲‧．．
可惜，到下車的時候，
都不知道說故事的是誰，
誰又是那位天才小音樂家．

今天，得閒無事，
尋找主題曲與片尾曲的主人，
再看她的介紹，
赫然發現，
她就是那位天才小音樂家！

她三月就開演唱會了，
會不會去現場聽聽她的歌聲，
豎個兩個小時的雞皮疙瘩呢？

杏仁的十六件事

在facebook被tagged了，
其實，再寫下去，還有一些可以寫．．．
不過，有限制，才有精華吧．

1. 家有四犬，名字由來：
　妹妹～當O左佢係女，中國人叫女兒總是阿妹阿妹的；
　貝貝～幽遊白書裡面隻靈獸；
　ZERO～怪誕城之夜裡面隻幽靈狗；
　大O舊～怪誕屍新娘裡面隻骨頭狗叫"小碎"，
　但收養隻雪橇番來，叫佢"小碎"佢唔應，
　氣頂起上O黎叫佢"大O舊"，反而有所反應，
　註定佢同我心目中剛剛相反．

2. 鍾意Tim Burton，
　o係佢筆下，悲劇人物永遠可愛，黑色世界才有顏色．
　尤其是怪誕城之夜，百看不厭；亦因為佢，所以鍾意Johnny Depp．

3. 鍾意亦舒，覺得佢o的小說，
　雖然主角有點不吃人間煙火，甚至劇情有點脫離現實，但訊息幾正面．

4. 鍾意譚詠麟，除o左歌聲，仲有佢o既樂觀態度．
　曾經有人問：如果譚詠麟自殺，我會點，
　我o既反應係：譚詠麟係唔會自殺o既．
　另外，曾經話過，有人對我唱出譚詠麟某首歌，我會嫁俾呢個人！

5. 近年鍾意楊宗緯，還有盧廣仲．

6. 鍾意利物浦，05年05月25日見證佢成為歐聯冠軍，
　希望09年05月24日可以見證佢o係主場成為英超冠軍！
　當然，如果早幾場已經篤定捧走英超冠軍，更好！
　另外，曾經幻想，結婚march in時o既歌，
　就係you'll never walk alone！

7. 平時打不還手罵不還口打掉牙齒和血吞，EQ似乎幾高又幾硬淨；
　不過，睇書睇戲甚至睇卡通片都好容易喊，最經典係睇龍珠都喊．

8. 小時候身體極之孱弱，點知長大後O係同事口中我好捱得．

9. 小時候好貪靚，唔o岩著o既鞋都話o岩著；
　點知愈大愈不修篇幅，時常著波衫返工．

10. 小時候o既志願係做dancer（！），
　 中學時想做engineer，
　 最後做o左reporter，依家係editor，好慶幸係chief o個隻．

11. 家父98年過世，但直到現在佢仍然深深影響著我．

12. 老媽子係我最敬重o既人，無論佢有乜O野要求，我都會盡量滿足佢．

13. 舊年結束o左一段六年o既感情，突然轉變o左對男友o既幻想，
　 希望對方高大魁梧，可能咁樣可以映得我相對地嬌小，哈！

14. 剛剛去完墾丁，愛上佢o既藍天白雲青山碧海，
　 想嫁個唔食檳榔o既墾丁男．

15. 長遠目標係去國內山區教書，一個學年咁多！

16. 希望o係有生之年，可以去多一次西班牙，同埋利物浦，
　 可能到時利記主場已經唔係晏菲路．

零八杏仁大事回顧

年結之後，四日就公布了業績，
不算遲了吧．．．

一．
男友第二次（或許不止）偷跳，
終於結束了長達六年的感情，
昂然展開了一個人四隻狗的生活．
（海嘯來之前，我已大撇帳，哈！）

二．
與在網絡世界認識良久的兩位blog友，
在真實世界中碰了面，感覺良好．
但，不知怎的，
從此與巔巔變得狗咬狗骨，
從此再也收不到沙維亞的神秘禮物．．．

三．

聽了場久違了的演唱會，

那夜，星光，非常燦爛，

亦代表著我逐步逐步恢復知覺，

與人接觸，

與音樂發生關係，

與小說重新認識．

四．

七年沒去旅行，
來個七年之癢，
對象是在國境之南的墾丁，
見識過其藍天白雲青山碧海，
好想可以再次翻雲覆雨，呵呵！

五．
利物浦在榜首過聖誕迎新年，
讓我回顧過去展望將來之時滿懷希望喔！


數完好事，想想不如意的：

六．
以為逃出第一重生天，
豈料風騷快活了兩個月，
又再跌落深淵．

七．
老了一歲，
身型繼續腫脹，
荷包繼續萎縮．

八．
咦，好對壞是五比二，
零八對我來說，
也是不俗的一年喔！

零九年，
杏仁兵團將會繼續努力！