見工記

如果奀子經常遇到騎呢男的話，
那麼，我也常常撞正騎呢見工人。

早前有個男孩子，台大新聞系畢業，
我心想，起碼有個國語人，做些神州內望之類的故事，也不錯。
可惜，問他新聞範疇當中，最愛那一瓣，
答案竟是：其實我志願係做體育版！
真係唔知好嬲定好笑，而我那刻實際的反應，
係要用手托番個下巴上來。

今日，我再遇上兩個極品。
先是一個年紀比我大的女子。
致電她來見工，她問：我住喺佐敦，應該搭乜嘢車嚟？
約了三點見面，兩時三十分，收到她來電，
又問：我搭緊118，應該喺邊個站落車？
完事之後，她再問：我依家去上環，應該搭乜嘢車走？
我就心想，第時你去採訪，會唔會問我坐乜車？問乜嘢問題？
繼而可能問埋，今晚食乜餸？應該幾點瞓？用乜嘢牙膏？照顧埋佢起居飲食。
或者不是年紀的問題，
就算有個「忽、薯、倔」咁樣問我，我都會覺得這個人腦袋有問題。

之後真的來個「忽、薯、倔」，
她的志願竟然是當時裝版記者，平常愛看三週刊，
然後再加句：你哋之文章，喺呢本定嗰本出？
我不是說體育版、時裝版唔好，
只係先生小姐，你見緊財經記者喎！
扮嘢講大話都要講財經故事好睇啦下嘛？！

猶記得當年不看財經版的我，
見工的時候，都硬生生推砌個好聽的理由，
說甚麼人人都關心錢，所以故事最貼身云云。
於是，從此我就跌入了深淵，陷入萬劫不復的田地。
而現在，就只能對以上幾個忠於自我的人，狠狠給幾個白眼。