扶貧

最近常為兩件大事而憂心，實在太多阻滯了，舉步維艱．．．
置業方面，銀行拒絕我之後，本來已經走進死胡同，點知絕處逢生，
哈哈，咁都俾我鑽出一條生路，
真係不得不讚吓自己之堅持，
yo，我真係覺得叻喎！！！！！！！！！！
不過，故事發展可能還會峰迴路轉，都係唔好太過得意，
以勉希望愈大，失望愈大．

創業呢，朋友Ｍ建議男友一起搞生意，賣玉賣水晶，
男友做開地產，突然轉行，好像有點搏，
不過機會難得，唔搏一定唔得，搏咗，回頭亦無悔吧，決定去馬！
插曲是，有個地產代理朋友Ｄ被撬到奧運站開舖，
於是反覆思量，一時話去，一時話唔去，
初時男友拍心口跟Ｄ搵食，最後卻在Ｄ猶疑之時扑鎚自己創業，於是覺得負了Ｄ．
我跟男友說，如果Ｄ開舖進行得如火如荼之時，你決定離隊，才算跣了Ｄ一鑊，
如今是他說去又唔去，最後突然又決定去，你沒可能等他一世吧．

說回Ｍ，他很是傳奇，男友認識他的時候，絕對可以霉DUP DUR嚟形容，
昨晚和他談起以往捱窮的日子，覺得：嘩！命運在他身上作了法．
當年他還是地產經紀的時候，窮得沒錢與同事食午飯，
每日便扮晒見客，然後靜雞雞的走回家中，與女友吃蒸水蛋，足足食了三個月！
真係老啲都驚膽固醇過高．
老套的是，只要肯做肯捱，唔會餓死．
他的女友試過坐舖，老闆刻薄之至，
新舖只得一張枱，一本簿和一枝筆，連電話都無！
同事都偷懶去了，有些更在枱底瞓覺，
她卻呆呆坐著（她以戇九九形容之），
數著門外的紅綠燈幾時轉紅幾時轉綠，以及住戶幾時出入，
而後來call客放盤換樓，這些資料竟然派上用場！
哦，原來你姓陳，自己做生意ｏ架？！唔怪之得日日七點多就返到屋企啦！
我點知？！我日日見到你行過嘛，哈哈哈哈．．．

之後二人轉行，賣玉賣水晶，發了達，細屋搬大屋，
眼見朋友霉DUP DUR，便扶上一把，幫襯吓炒樓咁．
最激的一個，是Ｍ直頭打本俾朋友做生意，又是賣玉賣水晶，
如今那個幸運的人已脫離貧窮線了！今趟輪到我男友．
Ｍ笑說，可能你會覺得邊有咁大隻蛤乸隨街跳，會諗我其實會唔會搵你哋笨？
我答曰：我哋仲有乜嘢俾人呃吖？心裡則將之定型為Ｍ的扶貧計劃二．